يوميات مدام س.ز في دائرة نفوس بيروت:

"شو عندك مدام"

 المدام: " بدّي اعمل بصمات عالسكانر للهوية"

"مدام، بدك تتضهري من هيدا المبنى و تنزلي نزول شي ٥٠ متر على إيدك اليمين"

المدام: " أوكي شكرا"

المبنى التاني:

"شو عندك مدام"

المدام: " بدّي اعمل بصمات عالسكانر للهوية"

"مدام، بدك تضهري من هيدا المبنى و تطلعي طلوع لتوصلي عند الدركي"

المدام: "عفوا، بس هني بعتوني لعندك"

بدّي اعتذر منك بس السكانر عندهم مش عندي"

المدام: "أوكي شكرا"

المبنى الاول:

"شو عندك مدام"

المدام: " بدّي اعمل بصمات عالسكانر للهوية"

"مدام، بدك تضهري من هيدا المبنى و...

"لاء اذا بتريد هلق بعدني جاي من المبنى التاني و قال السكانر عندكم"... بصوت عالي و شوية انفعال.

"مدام لشو معصبي، نحنا رح نفوتك أصلا، على كل حال تفضلي سجلي اسمك و بلا تعصيب"

المدام: " عفوا ما تؤاخذني ، انت يلي عم تمشي بالشوب طالع نازل متل الأهبل مش انا... وين مكتب السكانر"

"طلعي على الدرج و روحي يمين" .. طبعا ما في signs لتنقبر المدام تعرف وين تروح.

الطابق الاول:

المدام: " مرحبا، لو سمحتي وين مكتب لبصمة السكانر"

" انزلي لتحت مدام و اسألي الدركي"

 المدام: " هلق كنت تحت و سألت الدركي و هو بعتني لهون"

" طيب، إضهري من هون و روحي يمين و انزلي على الدرج و اسألي هونيك" 

المدام انقبرت ادركبت على الدرج و شافت دركي و سألته وين مكتب بنت الستين كلب ، السكانر...

" يا مدام انت من وين جيتي؟"

المدام: " شو قصدك مسيو؟ انا جيت من تحت من عند الأمن "

" طيب، ما مكتب السكانر مباشرة بوجه الأمن.. الاوضة الزجاجية.. ما قالولك؟؟... اسألي عن السيد ح.ب"

المدام من بعد ما وصلت على اخر مكتب بمدينة الملاهي: "حضرتك السيد ح.ب؟"

" نعم مدام، اتفضلي"

المدام: "لو سمحت بدّي اعمل بصمات للهوية على السكانر."

" لو سمحتي، حطي أصابعك على الساكنر... كتير ايديك عرقانين.. اتفضلي كلينكس نشفيهم"

المدام: " عفوا، بس بعدني مخلصة الماراثون و ال Iron Man Challenge و جاي لعندك"

بعد نصف ساعة من عملية كبس الاصابع بالمحدلة على السكانر

" بدّي اعتذر منك مدام، بس بصماتك مش واضحين ابدا حتى على الساكنر.. بدك تتضهري من هيدا المبنى و تنزلي نزول شي ٥٠ متر على إيدك اليمين و تعملي تقرير ان بصماتك غير قابلين للطبع على السكانر .. و تجيبي طلب خاص من مختار كوكب زحل و ترجعي تجي لعندي.. 

المدام هلق بغيبوبة بمستشفى الجامعة اذا حدا بحب يزورها... ما ضروري تسألوا وين بس الحقوا sign "مدام السكانر".. زوجها حب يحط signs حتى ما يعذب الزوار الكرام...

"بلدي حبيبي يا وطني الغني"... يا ترى زكي ناصيف بصم سكانر ولا عادي للهوية؟؟

حب المصايب

يعني انا هلق لو بدبح دجاجة و بصوّر عملية الدبح "live" و بنزلها على فيسبوك ما بضل إنسان عربي الا  ما بحط "like" و بيعمل "share" و " must watch" مش رفقا بالدجاجة بس لان الشعب العربي بموت بمنظر الدم و القتل و الاجرام و النحيب و البكي و اللطم.... يا الله ايمتا هالشعب رح يفهم ان الموت الو حرمة و ان الجرح ما بيوجع الا صاحبه ...الا اذا رح تهز حالك و تروح تساعده لهالمجروح يلي عم ينزف دم و انت يا عم تعمل "share" يا عم تقول " حرام، الله يعينه"... لك هالولد عنده أهل ، عنده ام عم تبكي عليه دم كل مرة انت بتعمل "share"....ولا مفكر أمه عايشة بكوكب اخر و ما بتوصلها social media..... رح تقولولي لازم العالم كله يعرف شو عم بصير.... مزبوط، صح، ما العالم كله بيعرف شو عم بصير بفلسطين من خمسين سنة، شو عملوا بالله؟؟؟عنجد هيدي أول مرة منشوف أمراءه فلسطينية عم تنضرب و تنهان من قبل الجيش الاسرائيلي... شو عملنا غير "share"؟؟؟  ما العالم كله بيعرف ان كل يوم بموت ٢٠ شخص بالعراق من ١٠ سنين لليوم بس ما بقى حدا يهمه لان ملهيين بليبيا و اليمن و سوريا هلق.... يا لطيف شو كيّف والده  "لآلان الكردي.." بصورة ابنه مع الامواج على شط البحر....على قولة صديقتي " صارت مسابقة لايكات بدون احساس" .....و يا ريت فيك تختار ما تشوف هالمشاهد، دغري بتنط قدامك عالscreen و بتلبش تلعب.... ما بعرف شو فكرته لهالعبقري Zuckerberg بهال update.... لك بالافلام بحطوا تنبيه ان في مشاهد عنيفة لاصحاب القلوب الضعيفة... و هيدا تمثيل مش واقع.... ليش الانسان صار عندو حب و اندفاع لتصوير المصيبة و الوجع ما بعرف؟؟؟ يا ريت عندو نفس الاندفاع للمساعدة و عالسكت....

كل شي فرنجي برنحي

الي كم يوم عم اسمع على كل نشرة اخبار  " لبنان بلد عربي" "لبنان بيفتخر بعروبته".... بس بتروح لتتغدى ب"Paul's" بتلاقي لايحة الطعام بالفرنسي فقط، بتروح على اوتيل  "بالزعرور" بتفكر حالك بباريس و كمان لايحة الطعام بالفرنسي فقط، بتفتح التيليفزيون بتلاقي إعلانات بالفرنسي، بتمشي بالشارع ما بتسمع غير هالامهات عم يحكوا مع ولادهن يا بالفرنسي يا بالإنكليزي ، بتروح تشتري بنطلون، ال vendeuse ( عيب نقول البائعة)  بتسفقك السعر بالفرنسي بتفكر حالك سارق البنطلون و عم بتم الاتصال بالمخابرات الفرنسية لالقاء القبض عليك... بتقوم بتجاوبها بالإنكليزي لتفرجيها انك متعلم و بتعرف لغة.... يعني ما عم بفهم عقدة اللبناني مع اللغة، ليش ما بقى حدا عم يحكي عربي؟؟ شو في؟؟ هالقد العربي بخجّل؟؟؟انو اذا حكينا مع ولادنا فرنسي او إنكليزي بيعلى مستوانا و منصير فهمانين؟؟؟  اكيد اللغة  الإنكليزية هلق كتير مهمة لانو للأسف نجحت بأنها تكون لغة عالمية تجارية و اولادنا بيحتاجو هاللغة ليوصلوا لشركات عالمية ، بس يا mom و يا dad،  مش ضروري تقلبوا البيت Microsoft و تعينوا ابنكم CEO لما يصير عمره سنة و اذا سمع شي كلمة عربي من سته او جده ببلط بأرضه و بيضحك من دون سبب كأنه محشش... صدقوني رح يتعلم يحكي إنكليزي كتير منيح بالمدرسة و رح يتوظف بشركة اجنبية و يصير مدير كبير، ما تخافوا .... اما بالنسبة للغة الفرنسية، بصراحة و بدون زعل ، ما بعرف شو الها عازة... يعني مش بكفي قاصف عمره لابنك بالمنهج الفرنسي المعقد  بالمدرسة، كمان بالبيت لازم اذا جاع يطلب الاكل بالفرنساوي؟؟ شو قاعد بال Entrecote هو؟؟؟ بس كرمال السعودية و اخواتها فجأةً  بتنقح العروبة و عنتر بن شداد بصير ابن العم اللزم..... منيح ما بيجينا مساعدات من الصومال.... كارثة # identity crisis

بلدي ليس وطني

كل شخص بيعرفني بيعرف اني بعشق الموسيقى و الفن و الثقافة. دايما الموسيقى و الغناء و الكلام المبدع بيرسمولي ابتسامة عَلى وجهي حتى لو كانت هالموسيقى او القصيدة حزينة.... و لكن اليوم لما سمعت قصيدة "موطني" للشاعر العبقري ، ابراهيم طوقان، بصوت الفنان الحساس " مراد السويطي"، انتابني شعور غريب جداً. طبعا هيدي مش اول مرة بسمع هالاغنية او القصيدة او النشيد.... او الملحمة التاريخية، بس هيدي اول مرة لا بشعر بالسعادة ولا بالحزن... هيدي اول مرة بشعر بالخوف... بالخوف من اني ما اعرف لمين او لشو بدّي دندن هالاغنية بيني و بين حالي....ليوم سألت حالي شو الفرق بين البلد و الوطن؟؟ ليش اسمه النشيد الوطني مش نشيد البلد؟ ليش كلنا للوطن مش كلنا للبلد؟؟ بس لما بتنسأل عن جنسيتك، السؤال بكون: "انت من اي بلد؟".... لان البلد هو المكان الجغرافي ، هو الحكومة و القوانين و الحجر و المناظر الطبيعية و المناخ... بس الوطن هو لما كل هالأشياء بتحكيك و بتحميك.... الوطن هو الارض و المكان يلي بتحلم ترجع عليهم من بعد سنين الغربة يلي اضطريت تعيش فيها لتسترزق... لاكن المضحك المبكي ان الغربة احتضنتك و احترمتك لدرجة انك صرت تعتبرها وطن... و وطنك بهدلك و قهرك لدرجة انك صرت تعتبره غربة .... ابشع شعور انك ترجع على بلدك "مجبرا أخاك لا بطل"... تخيل؟؟ تخيل لما صديقك بقلك:" والله مضطر ارجع على بلدي، شو بدّي اعمل؟؟"....اليوم انقهرت لأَنِّي حسّيت ان بلدي مش وطني...اني ما عندي وطن ... ما عندي ضهر و لا سند غير عائلتي ... ما عندي دولة تحميني او تعطيني أدنى حقوقي... عندي بلد بيسرقني،  بيمسح بكرامتي الارض و جابرني روح فتش على جنسية تانية حتى ما اتبهدل بآخرتي....  قال "ما بتعرف خيره ما تجرب غيره"... للأسف انا عرفت شره لما جربت غيره...

بعرف "البوست" اليوم لا بضحك و لا في السخرية المعتادة.. بس ما تؤاخذوني، إجت الصيفية و قربت نزلتي على بلدي...الي زمان ما اتبهدلت عالمطار... اشتقت كتير للتدفيش و الصريخ... انطروني 

"موطني موطني ........هل أراك سالماً منعماً؟؟؟

رسالة الى قوم لوط

كنت مقررة اخد "break" بشهر رمضان و ما افتح تمي بخصوص اي موضوع و اتفرغ للعبادة و التقوى بس اجا"Gayrack Obama" و خرب الدني...اوباما حبيبي قديش فرحان و فخور بقرارك الجديد؟؟ ناقصو شعبك ضياع؟؟ الاميركاني اذا بدو يفطر الصبح بيتصل بال"shrink" تيعرف اذا بيكول "Cheerios" الملون ولا السادة و اذا فتح علبة السادة و طلع فيها وحدة ملونة، دغري بوكل محامي و بيرفع دعوى على شركة ال"Cheerios" و بيربحها...  شو رأيك تسمحلهن يتزوجوا كلابهم و حيواناتهم الأليفة و يتبنوا شجرة ويشترولها ألعاب و ياخدوها عالملاهي؟؟؟؟؟؟

بعرف إنّو اصدقائي ال"gays" رح ينزعجوا مني.. و بعرف انو أصدقائي يلي مفكرين انو ما حدا منتبه أنهن "gays" كمان رح ينصدموا بكلامي... بس بصراحة، خلصنا فجور بقى... بكفي. عزيزي و عزيزتي ال"gay" خليني خبركن شي... يا حبيبي والله منعرف ان شذوذك الجنسي ناتج عن عدة عوامل.. يعني عندك خلل هرموني، قلبنا معك... تعرضت للتحرش انت و زغير، الله لا يوفق المختل يلي عمل فيك هيك... أمك تركتك تلعب مع أخواتك البنات و صاحباتهن تتخلص منك، الله لا يسامحها شو جاهلة..... بس يا ريت تشرحلي ليش بدك  تتزوج صديقك؟؟ اوعى تقلي لتعمل عيلة و تبني بيت... ما تجنني الله يرضى عليك...يا عيوني نحن متقبلينك بالمجتمع و منعرف  كتير منيح ان شذوذك الجنسي ما آلو علاقة بذكاك، يعني منعرف انك دكتور و مهندس و محامي فنان و أكاديمي (بالأخص أكاديمي ما بعرف ليش) و مصمم أزياء و كوافور الخ، فما ضروري تنطلنا بكل فيلم او مسلسل او "talk show" تتخبرنا انك طبيعي و واحد من هالهجتمع... خلاص يا قلبي ريح حالك و عيش حياتك عادي، ما تقرفنا....عامل همروجة و طوشي لتتزوج و منزلي ألوان قوس قزح و فرحان بحالك.. ليش؟؟ شو في؟؟ ... يا حياتي  طبيعة الكوكب يلي عايش عليه حالياً ، ذكر و أنثى ... يعني الشجرة لتحمل فواكة بدنا ندكرها، البقرة لتجبلك بقر زغير لتأكل لحمة بدها ثور، المعزاية بدها تيس و هلم جرة.... انت شو بدك بالظبط؟؟؟ ما فيك تعيش على هيدا الكوكب و تخالف الطبيعة يا عيني...هلق " Gaytopia" قيد الإنشاء و بس تتأسس هالبلد الا ما يفتحوا سفارة مطرح ما انت و بصير فيك تقدم عالجنسية و اذا كنت حليوة و حظك حلو يمكن ينغرم فيك القنصل و يسرعلك المعاملة.... يلا يا حبيبي، كبرلي عقلاتك و ما تسوق فيها كتير و تختبر صبرنا و بعدين تقول " ياااي شو هالعالم ال "sauvage"... لا زواج و لا تبني ولاد... تخنتها كتير...هلق صاحبك "الpedophiles" بصير بدو حقوقه و نفتحلوا محل ببيع ولاد زغار و يروح يشتري كم ولد تيتحركش فيهن.... بترضاها انت؟؟ مش حلوة...

اما بالنسبة لل"gay" العربي، بتمنى عليك يا عزيزي انك ما ترد عالمامي و البابي يلي عايشيين ب "denial" و تروح تتزوج بنت عيلة لتثبت للمجتمع انك طبيعي و اول ما تجيب ولد بتبلش تعيش حياة تانية و تجبلها السكري لمرتك يلي أصلا قررت تلعب دور النعامة... حبيبي كلنا عارفين انك "gay" ، حتى ولادك عارفين و شفقانين على امهم... فكون رجال او مرة (متل ما بتحب) و اعتذرلي من الماما و خليك بمصيبتك لوحدك.... 

بعرف انو هلق في كتير ناس عم بقولوا عني متخلفة و جاهلة و مش "liberal" و غير حضارية و ما بتقبل الاخر و الحرية الشخصية و "freedom for all" الخ...بشرفي معكن حق مية بالمئة. اذا بدكن تعطوني لقب الجاهلة المتخلفة لأَني ما قادرة روح احضر عرس "جاد و طارق" او "نوال و سعاد" فأنا رح كون فخورة جدا بهاللقب...معليش اسمحولي، بس ما قادرة شوف ابن جارتي يلي عمره ٣ سنين عم يلعب "عريس و عريس" مع رفيقه... تقيلة شوي.... صحيح " الي اختشوا ماتو" على قول اخواننا المصريين... C'est trop يعني...

لبنانيات و لأكن .....

اليوم سألتني بنتي:" ماما، ليش النسوان اللبنانيات كتير مجاديب؟ ما كانوا يروحو عالمدرسة هني و زغار؟". انا صرلي زمان تاركي لبنان فلذلك ما في احكي على النسوان بلبنان و مستوى ذكاءهم، بس خليني خبركن عن معظم النساء اللبنانيات و العرب في دبي. معظم هالنساء و بالأخص اللبنانيات مخرجين من اهم جامعات بلبنان و العالم و في منهن معهن "ماجستير" كمان و...... مساطيل بامتياز. يعني لما وحدة بتحط صورة كيس "شانيل" عالانستغرام و يتقول" حزروا شو اشتريت اليوم قبل ما سافر على باريس؟" جوابي لالها بكون: "اكيد يلي بالكيس يا حياتي اذكى منك، و بفتكر انه صباط اذا مش غلطاني". لما وحدة بتحط صورتها لابسة كل ماركات العالم فوق بعضها من قبل الضوء و كاتبة" signee from head to toe"، طيب هيدي شو بتحكيها؟ اللبنانية بدبي بتفيق الصبح، بتفتح خزانتها و بتبلش تلطم و تبحت بالأرض لانها بعد ما جابت الجزدان "الشانيل" الفستقي البنفسجي قبل صاحبتها، بتقوم بتركض عالبوتيك و بيطلع خالص هالموديل، طبعا بيجي اتصال لزوجها ان المدام انجلطت و  فاتت كوما بالمستشفى. هلق الزوج بهالحظة ما بيعرف اذا بيزعل ولا بيفرح و اول شي بيخطر على باله ان يبلش يعرض كل جزادين و سكربينات المدام للبيع قبل ما تفيق من الكوما.... ولك يا جاهلة إنتي و ياها، شي مرة فكرتي اديش أمك و ابوك بكيو انت و عم تتخرجي من الجامعة؟؟ يعني معقول بيصرفوا عليكي فوق ال مية الف دولار لتتعلمي و بالاخر يتكتبيلهن "my baby, my Hermes is finally here"؟؟؟ والله كنّا عتلانين همه  للمهدي المنتظر بصراحة.... ولَك ما بستحي تكون قيمتك من  قيمة الشنط و الاحذية و الفساتين الsignee؟؟ يعني من كل عقلك مفكرة انك من سيدات المجتمع الراقي؟؟؟ ولي انت ايمتى اخر مرة قراءتي شي كتاب او قصة؟؟و كمان شو بالنسبة لل٦٠ صبحية بالشهر؟؟ شو الهدف يعني؟ هل هو هدف انساني او لم تبرعات او عمل خيري؟؟او صرف مصاري زوجك يلي حضرتك مش تعباني فيهم ؟؟؟ و ما حدا يقلي القاضي راضي... لاء القاضي يا عم بفوت يبكي تحت الدوش او عايش حياة تانية و تاركك تلتهي بهبلك انت و أصحابك..... ولا الهدف الأساسي هو التصوير؟؟ كمان عفواً بس لمين عم تتصوروا؟؟ هلق لو في شلالات نياغرا وراكم ولا Big Ben و عم تبعتوا الصور لأهلكم بالهمجر، منقول.. بس يا دوب في حيط او عامود وراكم و قبل ما تتضهروا بتكونو بيعتين هالصور التحفة لبعضكم... يعني معقول؟؟؟ في اجدب من هيك؟؟ ما هلق شفتوا بعض live...  في شي صبحية من صبحياتك حكيتي عن شي غير الخادمة او الshopping او صاحبتك المبهدلة يلي بتلبس من H&M؟؟؟  عزيزتي المرأة المتخلفة، بحب قلك انك ما بتتميزي عن صديقاتك المتخلفين الا بلون السكربينة. بنصحك تبلشي تقراءي للتتثقفي و يكبر عقلك، أنشالله لو ليلى و الذءب او الاقزام السبعة، الا ما تستفيدي، شوي شوي بتوصلي و بصير فيكي تقراءي الجريدة و تعرفي العالم وين صار و انت وين بعدك يا شاطرة...فيكي تكوني signee و مثقفة بنفس الوقت.. صدقيني، بس هيدا النوع من الهبل بهالأيام مش مسموح أبدا... ما بدك تشتغلي فهمنا، ما في اشغال بالسوق ، معك حق ....بس مش مسموح يكون معك شهادة جامعية و ناقعتيها بمي و ملح من لما تخرجتي لحد ما عفنت و صارت متل عقلاتك..... قومي بقى عملي شي ينفعك و ينفع عيلتك، بهدلتينا...

الحرب المنتظرة

من فترة قصيرة حضرت محاضرة للدكتور البريطاني Christopher Coker و كان محور المحاضرة " حرب  التكنلوجيا"  يلي رح تصير بين أميركا و الصين قريباً و إنّو الصين عندها القدرة تعمل " hacking" على إصبع اجره الزغير لاوباما و تحركه كيف ما بدها من بيجينغ ...و اذا هسترت، بتقطع الانترنت عن أميركا كم يوم و يا روح ما بعدك روح.... تخيلو لو هالشي صار؟؟؟؟ بصراحة ضهرت من المحاضرة عم برجف ... هلاء شو بدنا بالبورصة العالمية يلي رح توقف و الاقتصاد يلي رح ينهار و المصارف و الشركات و ملفات الدول و المطارات و الأموال و الامم و الخليقة، هيدا كله مش مهم... الكارثة الكبيرة هي "الانستغرام". يا جماعة اذا بيوقف الانترنت في شي فوق ال١٠٠ مليار صورة رح يروحوا هدر.... شي ٤٠٠ ترليون سلفي للكب.... يا رب العالمين لا تجربنا، ما تفجعنا بقطع "الانستغرام" و "السناب تشات"و "التمبلر"و "الفيسبوك"... يا رب اذا انقطع " الفيسبوك" كيف هالعالم بدها تعمل " checked in"  و نعرف باي مطعم عم بتزمرقوا؟ طيب انا ما بيغمضلي جفن اذا ما عرفت صديقي ال " entrepreneur" العظيم باي "lounge" بالمطار و لوين مقبور مسافر؟؟ كيف بدنا ندعي لأصحابنا الموءمنين يلي بيتصوروا " سلفي والكعبة خلفي" قسما بالله وجوههم بتشع هبل ، عفوا قصدي إيمان ... يا رب انت العالم بحال النسوان لما بدهن يتصوروا.... معاناة الإضاءة و البوز و الشفاف و الايد عالخصر و الفلتر و بالاخر الديليت اذا ما زبطت.... يا لطيف ألطف ... برفض حتى اتخيل هول المصيبة....بنادي و بناجي كل ناشطات و ناشطين ( مع إنّو ما في فرق) السلفي و يلي بسافروا تيتصوروا بتوخي الحذر... نزلوا كل صوركن قبل ما الصين تفقد أعصابها ...والله ما بيبقى منكن مخبر و كل تعبكن بروح ضيعان.... يعني عملوا حسابكم تنزلوا معدل شي ٣٠٠ صورة باليوم ونحن من كل بد رح  نعمل "لايك" على كل صورة اذا الله وفقنا.....و يلي بتحب تنزل صورها من لما خلقت بالأبيض و الأسود تركض هلق تعمل "سكان"من البوم ستها، ما في وقت...الحرب عالابواب.