مبارح بالسهرة بيوصلني رسالة من صديقة عزيزة جدا على قلبي صرلي زمان كتير ما شايفتها بحكم الغربة و المسافة . كتير فرحت لما شفت اسم صديقتي و لكن انصدمت بمضمون الرسالة و هو كالتالي: " احضري قناة الجديد، هلق"... بدون مقدمات و لا تحيات. طبعا قبل ما غير المحطة كان زوجي ضب الشنطة و بلش يحجز على لبنان لان اكيد هيك رسالة بتدل إنّو في فاجعة صايرة . ما بعرف كيف الله سبحانه و تعالى عطاني القوة و غيرت المحطة على "الجديد" تشوف ......احدى علامات الساعة... الكبرى مش الصغرى. اجسام غريبة أشبه بالمخلوقات الفضائية تتكلم بلغة غير مفهومة و لكن من الواضح ان هدفها تدمير كوكب الارض. اول مخلوق متجسد بمكنسة فيليدا يدعى ميلاد ابو ملهب و المخلوق التاني عبارة عن دولاب شاحنة مع حواجب برعاية " Nike"، اما جنس المخلوقين غير محدد . البرنامج اسمه" بلا تشفير" يقدمه كمان مخلوق غريب و لكن لطيف جدا و شغلتو بس يغشى ضحك. بصراحة حاولت كتير افهم مضمون الحلقة و استعنت بمحللين سياسيين و خبراء تجميل و أطباء و مهندسين و لكن الكل أبدى عجزه عن فهم الموضوع. تحية كتير كبيرة للمحطات اللبنانية يلي بتحرص توصل صوت المختلين و تسلط الضوء على المجانين بهدف التثقيف و التوعية. فعلا الشعب اللبناني يفتقد لهيك نوع من الأجسام الغريبة ليقدر يتواصل مع العالم الخارجي.... كل الاحترام لقناة الجديد يلي عم تضطر تروح على كواكب اخرى و تحاور اجسام و مخلوقات أمثال ابو ملهب و حمادة و مريم نور و عاءلة الراسي و غيرهن من اصحاب الطاقة الهستيرية... نعم للانفتاح على الكواكب الاخرى، نعم للتواصل مع المجرات ، نعم لوجود البعد السادس، نعم "للافاتار".... "ET" اشتقنالك....
رابط الحلقة: http://youtu.be/n15pndw8jCo
