يوميات مدام س.ز في دائرة نفوس بيروت:

"شو عندك مدام"

 المدام: " بدّي اعمل بصمات عالسكانر للهوية"

"مدام، بدك تتضهري من هيدا المبنى و تنزلي نزول شي ٥٠ متر على إيدك اليمين"

المدام: " أوكي شكرا"

المبنى التاني:

"شو عندك مدام"

المدام: " بدّي اعمل بصمات عالسكانر للهوية"

"مدام، بدك تضهري من هيدا المبنى و تطلعي طلوع لتوصلي عند الدركي"

المدام: "عفوا، بس هني بعتوني لعندك"

بدّي اعتذر منك بس السكانر عندهم مش عندي"

المدام: "أوكي شكرا"

المبنى الاول:

"شو عندك مدام"

المدام: " بدّي اعمل بصمات عالسكانر للهوية"

"مدام، بدك تضهري من هيدا المبنى و...

"لاء اذا بتريد هلق بعدني جاي من المبنى التاني و قال السكانر عندكم"... بصوت عالي و شوية انفعال.

"مدام لشو معصبي، نحنا رح نفوتك أصلا، على كل حال تفضلي سجلي اسمك و بلا تعصيب"

المدام: " عفوا ما تؤاخذني ، انت يلي عم تمشي بالشوب طالع نازل متل الأهبل مش انا... وين مكتب السكانر"

"طلعي على الدرج و روحي يمين" .. طبعا ما في signs لتنقبر المدام تعرف وين تروح.

الطابق الاول:

المدام: " مرحبا، لو سمحتي وين مكتب لبصمة السكانر"

" انزلي لتحت مدام و اسألي الدركي"

 المدام: " هلق كنت تحت و سألت الدركي و هو بعتني لهون"

" طيب، إضهري من هون و روحي يمين و انزلي على الدرج و اسألي هونيك" 

المدام انقبرت ادركبت على الدرج و شافت دركي و سألته وين مكتب بنت الستين كلب ، السكانر...

" يا مدام انت من وين جيتي؟"

المدام: " شو قصدك مسيو؟ انا جيت من تحت من عند الأمن "

" طيب، ما مكتب السكانر مباشرة بوجه الأمن.. الاوضة الزجاجية.. ما قالولك؟؟... اسألي عن السيد ح.ب"

المدام من بعد ما وصلت على اخر مكتب بمدينة الملاهي: "حضرتك السيد ح.ب؟"

" نعم مدام، اتفضلي"

المدام: "لو سمحت بدّي اعمل بصمات للهوية على السكانر."

" لو سمحتي، حطي أصابعك على الساكنر... كتير ايديك عرقانين.. اتفضلي كلينكس نشفيهم"

المدام: " عفوا، بس بعدني مخلصة الماراثون و ال Iron Man Challenge و جاي لعندك"

بعد نصف ساعة من عملية كبس الاصابع بالمحدلة على السكانر

" بدّي اعتذر منك مدام، بس بصماتك مش واضحين ابدا حتى على الساكنر.. بدك تتضهري من هيدا المبنى و تنزلي نزول شي ٥٠ متر على إيدك اليمين و تعملي تقرير ان بصماتك غير قابلين للطبع على السكانر .. و تجيبي طلب خاص من مختار كوكب زحل و ترجعي تجي لعندي.. 

المدام هلق بغيبوبة بمستشفى الجامعة اذا حدا بحب يزورها... ما ضروري تسألوا وين بس الحقوا sign "مدام السكانر".. زوجها حب يحط signs حتى ما يعذب الزوار الكرام...

"بلدي حبيبي يا وطني الغني"... يا ترى زكي ناصيف بصم سكانر ولا عادي للهوية؟؟

حب المصايب

يعني انا هلق لو بدبح دجاجة و بصوّر عملية الدبح "live" و بنزلها على فيسبوك ما بضل إنسان عربي الا  ما بحط "like" و بيعمل "share" و " must watch" مش رفقا بالدجاجة بس لان الشعب العربي بموت بمنظر الدم و القتل و الاجرام و النحيب و البكي و اللطم.... يا الله ايمتا هالشعب رح يفهم ان الموت الو حرمة و ان الجرح ما بيوجع الا صاحبه ...الا اذا رح تهز حالك و تروح تساعده لهالمجروح يلي عم ينزف دم و انت يا عم تعمل "share" يا عم تقول " حرام، الله يعينه"... لك هالولد عنده أهل ، عنده ام عم تبكي عليه دم كل مرة انت بتعمل "share"....ولا مفكر أمه عايشة بكوكب اخر و ما بتوصلها social media..... رح تقولولي لازم العالم كله يعرف شو عم بصير.... مزبوط، صح، ما العالم كله بيعرف شو عم بصير بفلسطين من خمسين سنة، شو عملوا بالله؟؟؟عنجد هيدي أول مرة منشوف أمراءه فلسطينية عم تنضرب و تنهان من قبل الجيش الاسرائيلي... شو عملنا غير "share"؟؟؟  ما العالم كله بيعرف ان كل يوم بموت ٢٠ شخص بالعراق من ١٠ سنين لليوم بس ما بقى حدا يهمه لان ملهيين بليبيا و اليمن و سوريا هلق.... يا لطيف شو كيّف والده  "لآلان الكردي.." بصورة ابنه مع الامواج على شط البحر....على قولة صديقتي " صارت مسابقة لايكات بدون احساس" .....و يا ريت فيك تختار ما تشوف هالمشاهد، دغري بتنط قدامك عالscreen و بتلبش تلعب.... ما بعرف شو فكرته لهالعبقري Zuckerberg بهال update.... لك بالافلام بحطوا تنبيه ان في مشاهد عنيفة لاصحاب القلوب الضعيفة... و هيدا تمثيل مش واقع.... ليش الانسان صار عندو حب و اندفاع لتصوير المصيبة و الوجع ما بعرف؟؟؟ يا ريت عندو نفس الاندفاع للمساعدة و عالسكت....

كل شي فرنجي برنحي

الي كم يوم عم اسمع على كل نشرة اخبار  " لبنان بلد عربي" "لبنان بيفتخر بعروبته".... بس بتروح لتتغدى ب"Paul's" بتلاقي لايحة الطعام بالفرنسي فقط، بتروح على اوتيل  "بالزعرور" بتفكر حالك بباريس و كمان لايحة الطعام بالفرنسي فقط، بتفتح التيليفزيون بتلاقي إعلانات بالفرنسي، بتمشي بالشارع ما بتسمع غير هالامهات عم يحكوا مع ولادهن يا بالفرنسي يا بالإنكليزي ، بتروح تشتري بنطلون، ال vendeuse ( عيب نقول البائعة)  بتسفقك السعر بالفرنسي بتفكر حالك سارق البنطلون و عم بتم الاتصال بالمخابرات الفرنسية لالقاء القبض عليك... بتقوم بتجاوبها بالإنكليزي لتفرجيها انك متعلم و بتعرف لغة.... يعني ما عم بفهم عقدة اللبناني مع اللغة، ليش ما بقى حدا عم يحكي عربي؟؟ شو في؟؟ هالقد العربي بخجّل؟؟؟انو اذا حكينا مع ولادنا فرنسي او إنكليزي بيعلى مستوانا و منصير فهمانين؟؟؟  اكيد اللغة  الإنكليزية هلق كتير مهمة لانو للأسف نجحت بأنها تكون لغة عالمية تجارية و اولادنا بيحتاجو هاللغة ليوصلوا لشركات عالمية ، بس يا mom و يا dad،  مش ضروري تقلبوا البيت Microsoft و تعينوا ابنكم CEO لما يصير عمره سنة و اذا سمع شي كلمة عربي من سته او جده ببلط بأرضه و بيضحك من دون سبب كأنه محشش... صدقوني رح يتعلم يحكي إنكليزي كتير منيح بالمدرسة و رح يتوظف بشركة اجنبية و يصير مدير كبير، ما تخافوا .... اما بالنسبة للغة الفرنسية، بصراحة و بدون زعل ، ما بعرف شو الها عازة... يعني مش بكفي قاصف عمره لابنك بالمنهج الفرنسي المعقد  بالمدرسة، كمان بالبيت لازم اذا جاع يطلب الاكل بالفرنساوي؟؟ شو قاعد بال Entrecote هو؟؟؟ بس كرمال السعودية و اخواتها فجأةً  بتنقح العروبة و عنتر بن شداد بصير ابن العم اللزم..... منيح ما بيجينا مساعدات من الصومال.... كارثة # identity crisis